Waqt ke sath na badle to wo mausam nahi hota

Waqt ke sath na badle to wo mausam nahi hota
samandar ko kisi ke doobne ka gum nahi hota

jo bin awaaz aate hain wahi toofan late hain
garajne walo me to barasne ka dum nahi hota

tumhari muskurahat hi ayelan-e-jung-bandi hai
ishq me jeet ka koi doosra parcham nahi hota

luta do ishq ki daulat chupa rakhe ho jo dil me
kabhi taqseem se bhi yeh khajana kum nahi hota

kuch aise dard hain jo ta-umar hi sath rehte hain
waqt ke pas bhi har zakham ka marham nahi hota

zamane beet jate hain dilo ko paas lane me
alag hone ka bhi to faisla yek-dum nahi hota

ghazal kehne ki khatir aur bhi lakho massayil hain
faqat mehboob ki zulfo ka paich-o-khum nahi hota!

pyaas vo dil ki bujhane kabhi aaya hii nahin

pyaas vo dil ki bujhane kabhi aaya hii nahin
kaisa badal hai jisaka koi saaya bhi nahin

beruKhi is se badi aur bhala kya hogi
ek muddat se hamein us ne sataya bhi nahin

roz aata hai dar-e-dil pe vo dastak dene
aaj tak hamane jise paas bulaya bhi nahin

sun liya kaise Khuda jaane zamane bhar ne
vo fasana jo kabhi hamane sunaya bhi nahin

tum to shaayar ho aur vo ik aam saa shaKhs
us ne chaha bhi tujhe aur jataya bhii nahin.